Mae Llysgenhadon Ifanc Chwaraeon yr ysgol yn gwneud gwaith gwych wrth gefnogi gweithgareddau corfforol yn ystod gwersi Addysg Gorfforol ac yn allgyrsiol. Maent yn datblygu sgiliau arweinyddiaeth trwy rol fodelu a chyflwyno gweithgareddau i blant eraill yn yr ysgol. Wrth gymryd rhan blaengar mewn gwersi ac amseroedd chwarae maent yn annog disgyblion i gymryd rhan, cadw'n heini a mwynhau bod yn egniol, gan obeithio ysbrydoli ein pobl ifanc i fod yn gyfranogwyr gydol oes.

Yn ddiweddar mae'r Llysgenhadon wedi bod yn helpu arwain cychwyn gwersi Addysg Gorfforol trwy ddangos i'r plant ifanc sut mae cynhesu'r corff yn barod i berfformio, sut mae gwrando ar gyfarwyddiadau a chydweithio yn effeithiol. Maent yn dangos hyder a brwdfrydedd wrth gyflwyno'r ymarferion ac mae eu agwedd iach tuag at weithgaredd corfforol yn creu awyrgylch cadarnhaol i'r dysgwyr eraill.